Aksar ahbab ko shiddat se yeh ehsas tha keh badesion se mamoor Atlanta shehar aor uske mazafat main adabi sargarmi be adabi ki had tak mehdood hai. Hum main se aksar ahbab Insha Jee to hain nahin keh adabi guzara na hone ke sabab koocha-e-adab se hi kooch kar jain balkeh is shehar kay adaby khala ko purr karne ka tahayya kie bethe hain.

Haqeeqat yeh hai keh waqtan fawaqtan kuch ahbab kay gharon main sher o adab ki mehfilen barpa hoti rahi hain. Niji mehfilon se shuru hone wala safar ab bazm-e-adab ki taraf nahayat lagan aur ehtimam kay saath jaari ho chuka hai.

Adab ki yeh mehfil, tanzeem, nishast, aur web site, adab aur adab kay ehtaram tak mehdood hai. Is plateform ki bunyaad musbat nazari aur bahami izzat o takreem hai. Sher o shairy, nasar o rawayat, taqreer o taqabla, saaz o mauseqi, geet goi o fankari aur doosray jawahir-e-fanoon-e-lateefa hi bazam-e-adab ki jaan aur rooh-e-rawan hain. Bazam-e-adab ka talluq na to kisi maqami ya gher maqami siasi jamat, party ya manshoor se hai aur na hi kisi mazhabi soch ya tarz-e-amal se.

Bazam-e-Adab ke is poday ki aabyari musbat soch rakhnay wale woh bay los karkun kar rahe hain jo apne zaati, siasi ya mazhabi nazaryat aur mafroze mafadat se barh kar Bazam-e-Adab ki afadiat aur tehreem o takreem ko bala jaante hain aur unki is be losi se bohaton ka bhala ho raha hai.

---